جذعان ون نجنج على نجد كنه

من طرف **بدرالشمال** الثلاثاء مايو 29, 2018 1:41 am

في مدح القبيلة
لـ الشاعرشقير بن عقيل الجذع، بواسطة شقير الجذع الروقي، في غير مُحدد، منذ 11 عامًا
الشاعر شقير بن عقيل الجذع
شيٍ لقلبي صار فرضٍ وسنه

وهني من هو دالهن عنه مشقاه

حيٍ مداهيل الزمن فرقنه

احدٍ نحى وأحدٍ تقافت مطاياه

احدٍ مصالح وقتنا غربنه

واحدٍ له الايام دنت مناياه

من مات منهم قلت مثواه جنه

والحي ياالله تجمع الشمل وياه

حيٍ بكيته والمنازل بكنه

تبكي المنازل والبيار المطواه

عدٍ من اول بوشهم ياردنه

واليوم منهم كن مارايدٍ جاه

العدٍ مرمس والهبايب عفنه

ومقطانهم ذاري العواصيف تذراه

وين البيوت اللي ليا سد عنه

مقاطرٍ مثل الحيال المبناه

ينومسن العدٍ ويونسنه

بحوث النجوم اللي تنادى مناداه

كلٍ ليا صلى مع الصبح فنه

يدن نجره دنتين بمهواه

ليا شب ناره جاب هيله وبنه

وقدم لهن رسلان خمره ومصفاه

ومرسالهم من نغمة النجر دنه

وكلن يسج لبيت الاخر ليا وحاه

في مجلسٍ مافيه غيبه وضنه

رفقة شرف ماهيب رفقة مضاهاه

جزلين مافيهم ضعافه ولنه

بيوتهم لاهل الشكاله مبناه

تلقى الشحم للضيف برباعهنه

ونارٍ تدل اللي مضيع بمسراه

والطرش جايله على العدٍ رنه

تشرب ازلاله عقب تشرب سرياه

يازين فوق الحاض بارقابهنه

وسم العمود اللي عليهن وسمناه

باخدودهن يازين ولّحيهنه

اللاحي اللي للجذع مافردناه

من اليمين عن الغلط يحملنه

وسمٍ لهلنا الاولين ورثناه

جذعان ون نجنج على نجد كنه

ياما رعو من دار خوفٍ معذاه

في راي شيخٍ والسرب يتبعنه

يمشي السلف قدام والخيل تبراه

سرد المهار مكاظمات الاعنه

اصايلٍ من درّ عرّبٍ مغذاه

عن نجد ابن هادي محمد حدنه

وهو من اول كان ياخذ جزياه

شيخ قحطان اللي جموعه حمنه

حامٍ كروانه وحامن حباراه

عليه ردن البرا وطردنه

لين اتقى بالعرض واقصى قراياه

من ما سطت واد الرشا شددنه

واقفى عنه بالقلب الابيض وخلاه

والعشب عقبه فالمسايل رعنه

ترعا رعايانا مفالي رعاياه

فعلن على وضح النقا وضحنه

ايام ردات البرا للملاقاه

ودي بتوضيحه لمن يجهلنه

رد البرا والعاني اللي رفعناه

زريب رداد البرا شيخ هنه

شيخٍ برز في نجد فعله بشلفاه

ومن فعل اهلهن ورخن فعلنه

في صفحة التاريخ للناس تقراه

تاريخ فعل اجدادنا ورخنه

خيلٍ تحت فرسان نمرٍ مضراه

كم شيخ قومن للضرايا رمنه

شقت عليه مورد الجيب عذراه

وصاهود ابن لامي نهار ألحقنه

خلى رديفه للضرايا تعشاه

ومنهم قلعنا الخيل بأرسانهنه

واللي سرى منهم على سبت رجلاه

وتعاودن الخلج لعيالهنه

وردوا صغار الشول يرجع لمفلاه

ومثلثه والشعب مابين هنه

يوم اغدده كلن سمع عنه ووحاه

يومٍ به الجبعا الامير ايسرنه

في ماقفٍ ماص الهنادي هداياه

جانا يجر جموع قومٍ مرّنه

يبغى دبشنا مير جيشه قلاعناه

ستين عدّ الجيش بحسابهنه

اللي معه عقب الملاقا استظفناه

وشهودها من خوف شكه وضنه

غب النكوفه شاعر القوم غناه

وغيره ومثله وقعةٍ يشهدنه

يشهد به البكري وكبشان وغثاه

يومٍ انتوتهم غزوةٍ مستكنه

من عصر لين الليل خرمس بغدراه

وصالوا يبون البل وجاء دونهنه

ليلٍ على العدوان كثرت رزاياه

يوم اقطعو تال الدبش واطلبنه

بالعزوه اللي فأول الجيش واتلاه

خلن ابن درويش يختف ضنه

ينسى الطمع واللي يناديه ينساه

في ليلةٍ فيها هجد وهجدنه

وثامر رجع ذوده بعد سيق فتلاه

وبأيمن جبل سواج يوم انقضنه

فالمعركه صارت على القوم ماساه

وحباب هاك اليوم زيزوم هنه

وعلق صواب والي العرش ناجاه

وفي معتلجهن شيخ حرب اجدعنه

اللي رماه بكيلة الدرج مخطاه

ومن طاح منهم بالحوافر وطنه

خلي لعكفان المخالب تعشاه

وغنام يوم الخيل ذوده شعنه

ابن رشيد اللي يبذ المناحاه

بالفك عقب أيس منه بشرنه

فكه علي واللي حضر من دناياه

بحد السيوف المرهفات احتمنه

كم ابلجٍ قد املح السيف علباه

بالغصب مأردن بطلبه ومنه

جذعان وقت الحرب عرّيف وعصاه

جمعٍ يسوقنه وجمعٍ انطحنه

وجمعٍ شبع سبع الخلا من جثاياه

وبيسر جبل سلما مركاضهنه

مثقال طايح والسناعيس تنعاه

تنعاه شمر والعذارى نعنه

من ضرب شيخٍ تورد السيف يمناه

غازي عسى قبره ذعاذيع جنه

شيخٍ يشرفنا مجاله وطرياه

الطايلات ايمانهم يكسبنه

شيخان نمرٍ يلحقون المخلاه

ويوم الطراد ولسلاف احضبنه

الجوخ من بدّ القبايل لبسناه

مسلط رمى الجوخه على عيدهنه

عيد النضا اللي مع مخافه ومضماه

ووقف بها لين الجموع عرفنه

ونادى بصوتٍ كل من سمعه اوحاه

وقاموا مقامن بصدق مافيه ضنه

والجمع من هاك المنطاطح هزمناه

الرسم من هاك النهار ارسمنه

ولو الدير تملك بالاسما ملكناه

ودواس عكفان المخالب كلنه

رد النقا في ثارنا اللي قضيناه

بحد السيوف المرهفات اشلعنه

أحدٍ قطع راسه واحدٍ راح بيداه

ونادى المثاري والجبال اسمعنه

في ثارنا ما نقبل الصلح والجاه

هاذي فعول اجدادنا واكتبنه

ياصحف خوف يطول وقته وننساه

لنا الفخر بأفعالهم واعلننه

فعلٍ على وضح النقا ماسرقناه

وهذا الفخر للي هوى الطيب فنه

واللاش حي وميتٍ مافقدناه

اللاش ماقط اللوازم نصنه

وليا حسبنا اللازمه ماحسبناه

ويامطلق السنه بقت مستسنه

والساس جدره ماتغير بمبناه

ان شحّن ايام الرخى وان عطنه

هجرة رخى والذيب فلى مع الشاه

وقولوا لابوفيصل بما صرحنه

ابيات عن عوج المعاني منقاه

نقيت معناهن ووضحتهنه

وتمت بذكر اللي حجر مكه ارساه

من طرف **بدرالشمال** الثلاثاء مايو 29, 2018 1:49 am

،ديوان لشاعر كبير لن يتكرر ، انه الشاعر الكبير شقير بن عقيل الجذع الروقي العتيبي ، لا اعتقد إنني أستطيع أن اعبر عنه وعن أشعاره التي يعجز شعراء هذا الوقت أن يأتوا بمثلها ،

قصيدة (1) : ملحمة عتيبه
مشهاتهم هرموع غرب القراره
وخشم العريق وصفو واقصاه وادناه

وادن مسيله تحتديه الزباره
وادن غدير الضرس مارد رعاياه

هذاك شف متيهين الحواره
لاصار بالشبرم مربه ومرباه

لا بكر الوسمي ولجلج خضاره
ياهجر حي(ن) مامشى فيه هجراه

ما كف طخفه وستندبه ايساره
وللهضبه اللي رسها ينكري ماه

رس(ن) ليا حطيت ماه بغضاره
خطرن على اللي مادرى عنه يكفاه

وياصل ضواحي كشب وادنى سماره
وعد(ن) لعل مروح المزن ياطاه

حد السهل من نايفات الحجاره
لو انتحانا بالخطا مانسيناه

حتيش لو عشنا بجو الحضاره
قلوبنا بأملاك الاجداد مشقاه

مدهال ربعن يشعمون المناره
لطامة العايل نهار الملاقاه

عدٍ قراح وعدٍ همجن بياره
الله يرحم سربتن ورثوناه

قبيلةٍ يعرف بها العد كاره
الاسم بين والقبايل مسماه

يكتبنا التاريخ بأسمه عباره
مشددتنا جردة الركو عن ماه

جمعن علينا ودهم بانتصاره
وعن حدنا وقت المواقف حديناه

باللي عباريده تقادح شراره
لوقعت في صامل العظم تشضاه

ندحم به الاجناب جبر وجداره
والعد حده من اعدانا احتميناه

لا لا المشايخ نزلة والاماره
وحطو حدوده من ورى حد مضماه

سقوى ليا عج النفل في حجاره
وتعاقبت خضر المسايل بقفعاه

فالبرد ولا في ليالي الحراره
يازين مقياضه ويازين مشتاه

تصبح وتمسى في وبرها غياره
حمى الشعاف وكل شي جربناه

وليا نويت من الشفا بانحداره
اطمن على عردان وانزل حوالاه

واخذو لها يم اسفوات افتراره
وردو سجا وانزل جنوبن لمضماه

في جاضع المشقوق بايمن مطاره
وخل الدبش عبلة خساران مفلاه

يومن على البره يومن يساره
على الينوفي وشربوا كرع خبراه

تراه من نجد المسمى خياره
يازين سجات القدم فيه زيناه

دارن تقول هضابها نصب شاره
يصفق عليها النود من كل مجهاه

بيض العبال اللي هواها طهاره
لروح نسيمه هايم القلب داواه

ماكفه الصاقب لحد الفقاره
من لاربا فيه الدبش ليش يجناه

خسارتن جنيه وتبعه خساره
لو كل نفسن في وطنها مشقاه

وكلن على فكره يقول اختياره
ولو خيروني غيرها دار مبغاه

من ابرق ابن حميد والعلم اشاره
للحمي ولبة النير واغثاه

وايضا من الماء الحي شعر ومفاره
من الجثوم للرقاش وهباياه

سنام نجد اللي يسمى فقاره
كم شيخ قومن جاء يباه وطردناه

لو يلحقون القوم غاره بغاره
كلن نسوقه لين نقلع نحاياه

يشهد به الاوصر وحِبل ومداره
ومعتق وعرجا والبر اللي رفعناه

وطلال يوم ان الجو ثور غباره
قامت مضاوي طيب الخال تنخاه

سقنا عليهم سوقتن بانتصاره
ومنا جموع القوم كثرت رزاياه

يومن صحايف نجد تعلن خباره
وقال شليويح العطاوي بمعناه

ألد روق اللي تهوش بجباره
تشهد لهم ضلعان نجد المسماه

ويوم غدده واللي بجو النماره
ويوم الرحا ووضاخ تشهد ركاياه

ويشهد شدا باللي وقع في جواره
عد اربعه قال المخازن معباه

في ماقعن يم التناضب دياره
من الوسيق اللي خذوه استعدناه

والمجمعه وسواج يشهد نهاره
والحفر والعصلا على مسمعناه

وادن يحد مهايفات الصباره
ورضوان واللي مايلاتن في ياياه

وسود الجبال اللي شمالن ستاره
تشهد بفعلن نسمعه ما لحقناه

ويم رغبه شرقي جنوب الخضاره
من ضرب ابن هندي زبون المخلاه

تسعين لحية خليت فالمعاره
يوم العوين ادوع الدار باسماه

صارت لهم روس المناعير شاره
في نجد لين انه من القوم صفاه

شيخن ليا شبوا هل الحرب ناره
يشب نارن تحتمي اللي حوالاه

وهذال اخو هملا زبون الخساره
وشبيب والهيضل وناصر وشرواه

وابا العلا خيال شورن صغاره
نبت الحيا لو هو ورى القوم ترعاه

وخزام والجامع رجال الوقاره
من ضربهم حد السلايل مرواه

ريف الشجيع اللي جواده تبارا
لجالهم عند التوالي مناداه

لابد اللي ضارين بالسباره
في راس مرقابن طويلن معداه

وشاف الجموع ولاف كبده حراره
ونادى لجمعن في وعده يتحراه

قبل الطمايع كبدوه الخساره
برقا على كبده يحطون عرقاه

وفي نجد يومن مجنتن عصاره
كم شيخ قومن منه بيته شلعناه

ماهيب بالحيلات ولا بصاره
وضح النقا المجرود محدن غدرناه

مسلط ليا قالوا هل الخيل غاره
شيخن تعشي حايم الطير يمناه

وزريب يوم الدار شدد حصاره
رد البرا واللي حمى نجد جلاه

والضيط يوم الجمع جاله كراره
وابن محيا اللي تورخ سجاياه

يكفى كلام اللي حضر في نهاره
برغش بدع قافن من الشعر غناه

عن شبرهم تقصر طوال الشباره
ويفرح بهم شونن عقيده تقفاه

وبخيت وشليويح نمر النماره
مورخن فعله قصيده وشلافاه

وقشعان والشغار وخوان ساره
فكاكة التالي نهار المثاراه

والحفر تشهد للزلامي حراره
وتشهد عليه النايفه من حجاياه

خلا جموع القوم تكثر فراره
ومن مات منهم ذيب زبنه تعشاه

واللي طريحه مايضم الجباره
ابو خشيم اللي كبارن وهاياه

وليا اعتزوا والراي طول حواره
فاجر فناجيل العدا ماتعداه

وشليل لين جاء اللي يبا رد ثاره
يفرح به اللي حزة الضيق ينخاه

وليا لبس خيال قومن وزاره
لأبو سنون وللوبا صين مدلاه

غير الظفر للهوش فيهم شطاره
ونعمن ليا وصل العدد توم وحفاه

يكفى من الفعل الكثير اختصاره
واللي بقافه ذيب ابا الفوس وصاه

واثنين فيهم مع ظفرهم نعاره
ليا جاء نهارن يوصل العلم قصياه

ابن زيد والعصاي والعلم اشاره
فرّيس نمرن ماتعرف المجاجاه

قلته وقول الصج مافيه عاره
والكذب عيب ومن بغا الكذب يلقاه

والهرج يكفى عن طويله قصاره
والقاف شاب وفعلهم ماحصيناه

ألد روق اهل العطف والاماره
مافيه نقبل صلح ولا مساواه

كم بارقن جانا وحصل دماره
وتزهبت شهب الحنادي جثاياه

وكم بارقن جانا وحصل دماره
وبرقا خذو خيله ساقوا مطاياه

وكم بارقن جانا وحصل دماره
وكم بارقن منا عليهم نشرناه

في ماقفن كن الرصاص انفجاره
رعاد وسمٍ تقافت عشاياه

بالسيف واللي ماتغير عياره
ياما قتل منا ويما قتلناه

يما شربنا فيه حلو ومراره
خضنا المعارك فيه لين امتلاكناه

ربعن على الطاله تسوق البشاره
حنا عتيبه نوصل العلم منهاه

في سلمنا ما يلحق الجار باره
يدله بجانبنا وينسى دناياه

ماقط باتوا ماتعشوا صغاره
ولا قط جاله لازمن ما قضيناه

ما يشتكي ورعه خطانا وعاره
وخطاه لو انه ثقيل احتملناه

يبقى رفيع الراس في ضف جاره
وليا رحل مما نحوشه عطيناه

ولدخيلنا في سلمنا واعتباره
عامٍ وشهرين عليهم فرضناه

ايضا وقابل للزياده قراره
وما تسامح طالب الدين زدناه

لو حاولوا ديانته في حصاره
لا لجا بوجيهنا ماحدن جاه

وليا حمسنا البن زدنا بهاره
مع مرحبا للضيف لو معرفناه

نعطيه ماجوب الكرم والزياره
ونجعله الحايل من البل ثمن شاه

ما ناخذ السلم الشريف استعاره
سلمن لهلنا الاولين ورثناه

ولا ننظر العالم بعين احتقاره
وليا بلينا رب موسى طلبناه

وليا نوتنا غزوتن بانكساره
كم غزو قومن فالملاقى كسرناه

البني من ساسه عزازة جداره
برقا وروق وكل ماقف ذكرناه

ياما رموا لمجوعات الجحاره
من راس شيخن تورد السيف يمناه

ليا دق حراب المعادي انطاره
تصبح قلايعهم مهارن مغذاه

غير السطل والحوش فيهم مهاره
روقي وبرقاوي بني عم وعّزاه

اللي يواعدنا نزوره بداره
يصبح عليه الجمع تردم سراياه

جمعن على فك التوالي شعاره
حنا عتيبه وأزين الدار اخذناه

فيها نزلنا وانتشرنا انتشاره
والعد لو ان جوه مخيفن وردناه

على مواردها مسكنا خفاره
جمعن يصبحنا وجمعن هجدناه

ملحق قبايل نجد فيها عياره
لكن اعد الموقف اللي وقفناه

اعلونا بالحجز واقصى حراره
وشرقينا العارض بغربي قراياه

مثناة نجد اللي تصاهل مهاره
زحنا قبايل نجد عنه ونزلناه

ما ملكنا بلها سلف واستعاره
بالسيف اخذناها وشلفن محناه

مضرابها زرنح مع ازراره
منها طويل الامن تدني مناياه

عنها نفد القوم فد النماره
لين اصبحت مثل الجزور المجزاه

وكلن بقسمه قام يبدع بياره
والحكم غيم وما دخل فيه غطاه

ضفى عليه الصيرمي الستاره
عبدالعزيز اللي عسى الخلد ماواه

وفيه حكم بالشرع واصدر قراره
وغيم الجهل نور الشريعه تجلاه

من طرف **بدرالشمال** الثلاثاء مايو 29, 2018 1:51 am

قصيدة (2) : في مدح الشيخ سلطان بن جهجاه بن حميد

هات القلم واكتب جديد التماثيل
مثايلن يطربها اللي قراها

تطربلها روسن تحب المفاعيل
وتزعلبها روسن قصر مستواها

جزلات عذياتن من القول والقيل
ومن منطق الكلمة يبين معناها

الشرح كافي والمعاني دواليل
ولا كل من حاز الطويله رقاها

شكون على اللي للمهمات حلحيل
حلاّل صعباتن تصعب قضاها

حلاّل صعبات القضايا المفاتيل
لدارت البلوى ركبت رحاها

سلطان ابن جهجاه منصى الرياجيل
ذخر الرجال اللي يذري ذراها

شيوخن حمو نص الجزيرة على الخيل
يوم الرماح بكف جده عصاها

ليا اعتزوا بالعزوه اللي لها صيل
المقبلات اقفت تقادح حذاها

ليقال ابن هندي وسمعوا هل الخيل
كلن نشد عن سابقه وش وراها

يبغى نجاته قبل قصف المحابيل
والطامعين اغلى الطمايع نساها

فكاكة التالي ليا غطرس الليل
ولا كثر بأسمى القبايل نخاها

لا حل بأطراف الصبايا محاويل
ألهم زحول القوم ترفع ايداها

ليا راح ضرب الماس مثل الهماليل
والعج والبارود الاشهب غطاها

في ساعتن بعقول اهلها ……
ستر الصبايا ليا تجلى غطاها

ترعابهم فالخوف عرب الاباهيل
وتاصل بهم سهب العشاير مناها

امارتن من جيل ورث بها جيل
عز القصير وحربتن لقبلاها

مهيب امارة ختم هرج ودهاويل
شيوخن على اولها بعيدن مداها

منزالهم في عاليات المنازيل
تشهد لهم ضلعان نجد وحصاها

وألهم على الدار المخيفه مصاويل
يوم الحمى بالسيف باجوا حماها

هم مقدم الهيلا حياض المناهيل
يقدون بقدا نمرٍ للحريب مغزاها

نمرٍ إلها دار المخافه مداهيل
في ساعتن رد البرا لحلفاها

خلت زعيم القوم ينسى المقاييل
يمسى بدار ودار يصبح وراها

ربعن على طرح المجوف مغاليل
شيخان قومن ما ضامد خلاها

عتيبه اللي فالمباطح نواجيل
وعلى ظهور الخيل تكعم عداها

فالارض ابن هندي وفالكوكب سهيل
ذكر الرجال ونجمها في سماها

اقولها ياشيخ واشكيلك الميل
سود الليالي بينت لي جفاها

لاحظت من نظرة زمنها الغرابيل
من وجهها ولا عطتنا قفاها

دنيا على غلب النشاما معاجيل
ولا ضعوف الناس ريفن علاها

وما وقفت بقاسي الفكر والحيل
ولا السباع الدقم صرنا عشاها

ياشيخ تكفيك المعاني من القيل
وباقي معانيها على الله قضاها

خلاق محيي ميت القشع بالسيل
مجري سفينة نوح في موج ماها

من طرف **بدرالشمال** الثلاثاء مايو 29, 2018 1:53 am

قصيدة (3) : في مدح الشيخ تركي بن عمر بن ربيعان

يالله المعبود يامنشى السحايب
يا اله كل الامه تلـتـجـيـبه

ياعزيز الجاه علام الغوايب
من دعاك ادعات مخلص تستجيبه

تاصل الطيب وقضاي النوايب
والردي تقطع من الجبعه نصيبه

في حياته ذوقه مر الغلايب
وفي مماته جعل رحمتك تعذيبه

الرجال اصناف والدنيا عجايب
والعلوم اطوال القصه غريبه

واللوازم عرفتنا كل خايب
وعرفتنا وقفت الطيب وطيبه

والفخر للي ليا جات الصعايب
ما يصد وفعل غيره يستنيبه

مثل تركي ذخر حماي الركايب
شيخنا اللي فالمواقف نعتزيبه

شيخ روق عمر حلال النشايب
يطلق المسجون ويفلش صليبه

حاضرن ذكره لو ان الراس غايب
مثل نجم سهيل كلن يقتدي به

من شبابه لين مات العام شايب
كل شيخان القبايل تلتجيـبـه

ويوم مات معقبن عطب الضرايب
تركي اللي للخفيفه والصعيبه

مثل ضلعن ماتزعزعه الهبايب
والحجا يامن به اللي يحتجي به

مزبن المضيوم تنصاه النجايب
من حداه الوقت نصاه النجيبه

مزبنن للطيبين عن المصايب
نايد الاجناب ولا من عتيبه

من بلي بمصيبةٍ ولها سبايب
عنّد ولا جتبها القدره غصيبه

اجنبي ولا من الربع القرايب
يزبنه عند اللزوم وينتخي به

تركى اللي لو شري بالدم رايب
نصرت المظلوم من فعله وطيبه

ماص مفراص يخلص صلب ذايب
الصخور تذوب منهو لا تذيبـه

معدنه فولاذ وفعوله غرايب
ذخر شيخانٍ مضاربهم عطيبه

كم جريح وكم قتيل وكم صوايب
وكم شعيبن قد شبع طيره وذيبه

من يدين مروية عدل الذرايب
جب شلفا بسرة القلب تغدي به

مثل معتق وانشدوا هاك الجذايب
وغيرها اللي في طلال وفي شعيبه

يوم جاء للملح دخان ولهايب
ثم ساقوا بالجمل ساد الذويبه

وقعتن تودع سواد الراس شايب
والمنع مرفوع مازولن يحكي به

من طرف **بدرالشمال** الثلاثاء مايو 29, 2018 1:56 am

ديوان الشاعر الكبير : شقير بن عقيل الجذع الروقي العتيبي
قصيدة (4) : قالها شاعرنا وهو في الهند عندما صادفه عيد الاضحى وتذكر عوايد وعادات نجد العزيزة

العيد يلي ترفع الصوت بالعيد
عانه بنجد الله علينا يعيده

عيدن مع الربع الحشاما الصناديد
وذبح الضحايا والهدوم الجديدة

مهوب عيد مغيرين التقاليد
عبادة الاصنام فوق الجريده

هندي وهندوسي يقوسن عساريد
عسى لهم ماعاد يبقى شريده

عسالهم من دولة الصين تهديد
ذريتن عامر بلدهم تبيده

تجمد انهاره من الاشعاع تجميد
ساعة لينه رايحن في وقيده

لحيث فيه العيد ماشفت انا عيد
قولي يا ذاعه واكتبي ياجريده

قولي ما قال العتيبي بترديد
مبروك عيد اهل الديار البعيده

مبروك عيد المملكة علم تأكيد
الاولى كلمة والاخرى قصيدة

دار الشهامه والشرف والاجاويد
ألي بها سنة محمد جديدة

مهبط وحي شيد به البيت تشييد
مجري سفينة نوح خالق عبيدة

ربٍ مشرفها على جملة البيض
طهر مشاربها وطهر صعيده

عسى عليها السيل يمطر تراديد
يحيي شجرها اللي يباسٍ هميده

دارٍ ورثناها من الجدّ والجيد
يومٍ كل وقفته مع عضيده

فيها رعانا بالبكار الملاهيد
وسرد المهار مكاضمات الحديده

ننزل على راع الوعد بالمواعيد
يصيدنا ولا المنايا تصيده

ربعي عتيبه من خيار الاواليد
على ظهور الخيل روسٍ عنيده

نصدر ونارد في نهار المواريد
نشرب ونزي اعدنا من نكيده

قومن نصبحها وقومن مهاجيد
وقومن نقابلها نهار الوعيده

وفيها نزلنا والقبايل عراجيد
لثوّر البارق قداه العقيــده

وبالسيف اخذناها وحمر العباريد
ما سند العارض لحد اللبيـده

من الجنوب حدودنا الهضب وتزيد
ومن الشمال ليا العساكر وعيـده

وفيها اقتسمنا يوم جينا معاويد
يومٍ كلن فعل ربعه رصيده

رصيدنا مرضى امهات المفاريد
فوسط نجد من المرابي وحيده

عنها القبايل من وحمنا ملابيد
عيا عليها شيخنا من حديده

جذعان اخذنا بأملح السيف تمجيد
ومن نجد اخذنا مثل اهلها بجيده

نرعاه بأقطاعن عليه العواميد
فالصيف ولا في مواسم جليده

وسم الجذع بأرقاب قطم العماريد
من اليمين وكل يمنن حميده

نخض به نجد العذيه تراديد
ونرعى به اصنافن نواته جديده

وسمن يعرفونه هل السيد والبيد
قحطان ومطير وقبايل عديده

في ضف ربعن ينقلون البواريد
مروين جب مصقلاتن حديده

وليا تناطحنا بخطو الجراهيد
اما طرحنا الشيخ ولا جنيده

من ضرب سيف زريب يقف اكاديد
راع الحصان اللي فعوله وكيده

شوخٍ تمجده المفاعيل تمجيد
ابن رشيد كلمته مع اقعيده

محمد العبدالله الشيخ وعبيد
عن شوخنا عدو افعولن عديده

فعلن يعز الروس كيدٍ لهل الكيد
لو طالت ايامه جديدن بريده

وتشهد لنا صم الجبال المحاييد
وما قال ابن ماعز بحرف القصيده

واقول عدة العيد يا معيد العيد
الله علينا في بلدنا يعيــده

من طرف **بدرالشمال** الثلاثاء مايو 29, 2018 2:02 am

ديوان الشاعر الكبير : شقير بن عقيل الجذع الروقي العتيبي
قصيدة (5) : في مدح الشيخ تركي بن محيا

يالله يا خالق العالم ورازقها
ياعالم الغيب يارب السما العالي

تحفظ إلنا اللي ليا ثقلت علايقها
يرسيلها مثل ما يرسى الاقثالي

شيخٍ يضم القبيله مايفرقها
تركي ليا طال حبل المرجله طالي

لو ترتفع للعلا يمناه تلحقها
وان حولت له على الجزلات محوالي

قلته والاجواد تعرف طرايقها
ولا كل منهو يفل البشت رجالي

بالشكل واحد لكن الله مفرقها
للطيب الطيب والنذله للانذالي

والناس بأفعالها تعرف معامقها
وليا جهلت الرجال انظر للافعالي

لا تستمع فالهروج من ينسقها
ولا تنخدع بالهدوم وكثر الاموالي

الطيبه عان ابو متعب يسوقها
ما حط واحدن رخيص واحدن غالي

ريف القبيلة ليا جاء من يشققها
ذرى عن البرد وظلالٍ عن الصالي

كن المشاوط على بابه محارقها
للي يجي العصر ولا يجي العشا التالي

النار تشعم وحيلٍ في معالقها
شيخٍ ولد شيخ للشجعان مدهالي

جزل المفاعيل عاشقته وعاشقها
ماحط له بيع شاش الضعف مقيالي

تشهد له الناس واسمع قول ناطقها
ياجاهلن بالفعول جزال وهزالي

سربة محاي ليا شرت بوارقها
ترعا بهم فالمخافه عرب الابهالي

ترعا بهم درب ندر لاح بارقها
لو كان ما نوش ولا ماقعن خالي

تصريحه السيف والعاني بنادقها
شيخان نمرن لها رنه وزلزالي

شوخٍ تعز الرفيق اللي يرافقها
وشرٍ على من نوه بحرب وقتالي

بالفعل تشهد لهم نجد ومناطقها
ومعتق والانصر وبرغش قال ماقالي

الشمري بالمثايل قال صادقها
قولن على فعل تاريخن للاجيالي

قلب الجزيرة ومغربها ومشرقها
وشالح رثى ذيب حي وقال الامثالي

يقول خيل المحيا ومتطرقها
ومما ذكر والعلوم قصار وطوالي

متروك ذيب السرب والخيل يطلقها
وتركي وديع الركاب مع اشهب اللالي

ليا تغير وبرها من معارقها
ياما اشبع الذيب من رجلي وخيالي

وعفاس بالفعل تشهد له خلايقها
مخلي سروج الرمك من روس الاشبالي

كم شيخ قومٍ نهار الكون فارقها
حطت عليه السباع العرج مدهالي

بمصقلن ينسف الروس بمعانقها
ولا بشلفا تخلي الدم وشالي

شوخٍ على فعلها تشهد سوابقها
لو غاب الاول نزل منازله التالي

مهيب كلمة يقال اني ملفقها
الفعل يعرف وهرج الصج ينقالي

إلي الشرف يوم اعبر عن حقايقها
وتركي هذا ريف من هو رده الجالي

الطيبه من فعوله ومتفوقها
يعطي العطايا ولصعبات حلالي

حلال فتال والقاله يغلقها
عمل الذهب ماخلطها قرش وريالي

لكبود مثل العسل وكبود يحرقها
زيزوم جزل الفعول خفاف وثقالي

قلته ولي غايةٍ جعله يحققها
جيبٍ من اللي ورد في عامنا التالي

اوراق جمرك رقومه محد طبقها
يبرد لهيب الضمير مع الخلا الخالي

ابا اسهجه مع عذا نجد ورقارقها
امشي مع البدو كود الهم ينزالي

من طرف **بدرالشمال** الثلاثاء مايو 29, 2018 2:33 am

ديوان الشاعر الكبير : شقير بن عقيل الجذع الروقي العتيبي
قصيدة (7) : قالها شاعرنا وهو في زيارة لمصر مرافق له مريض وتذكر نجد وقبيلته عتيبه

اليوم انا قلبي على خف وجناح
ما عاد يبغى مصر شطه ونيله

حتيش لو يطلع بمنجى وتفاح
وحتيش لو فيه العماير طويله

دارٍ ابها المشهور مصري وفلاح
ما حدٍ يعد اصله ولا له قبيله

ربعٍ تضيف ضيفها رجل وجناح
واطيبهم اللي جاب ديكٍ يشيله

اشتاله البركان والصبح منباح
وعوض مبانيها الرفيعه نثيله

ويصبح صحن صاحي من النزل صحصاح
وينجابه اللي خالقة يعتني له

ينجابه اللي فيه يأمر بالاصلاح
ومن لايخاف الله عسى الله يزيله

دارٍ انساها لبسها شرب وشباح
واللي يحاكيها تقف وتحكيله

يمشن والاسلاب من قدم فتاح
وانا دخيل الله منجي دخيله

ماجيت له ياسيد البيض سواح
ولولاك والله يا الغضي ماعنيله

ولو قلت لك مرتاح ماني بمرتاح
يعلم به اللي كل همٍ يزيلـه

وصبرت لاجل دواك ياضبي الابراح
هذي من السفره ثلاثين ليله

اقعد من المغرب ليا نور الاصباح
القلب كنه فوق حامي المليله

قلبي قفل وله الهواجيس بمفتاح
ليا صدر هاجوس الاخر يجيله

صبرت صبر ايوب لين الصبر راح
راح الكثير ولا بقى الا قليله

قلبي كما طيرٍ دعيله بمرواح
هواه نجد وجلستي ويش هيله

وجداه يا شمة ذعاذيع الارياح
في نجد غب مروحٍ سال سيله

من الحجاز ليا شروره والاسياح
ما به شعيبٍ ماتدارج مسيله

ديرة مكسرة الجنابي والارماح
ماهو بدار مصلحين البليله

دارٍ بها عشنا شريفين وصحاح
ما قيل ذي جربا وهذي عليله

يازينها لو عيشها صعب وكفاح
وياحلوها لو شربها حنضليله

وياما حلى فيها ولد باش سراح
سجه ومع بعض الرجال تعليله

في مجلسٍ هرجه سواليف ومزاح
والنار تشعم والمسير يجيله

والكبش جابه من هل المرح الاشحاح
من ضان رباط العصا في صميله

وقال اقلطوا ياعيال عن الشبطاح
ورمى الشوا بين الحطب والنثيله

لا من طير النبت غب النبا ناح
هذي طرات العمر والله وكيله

ويازين فيها جلستٍ قبل الامراح
صافٍ قمرها غب نو المخيله

فالعبله اللي رملها تقل مسباح
ابيض كما اللولو والاحمر مثيله

يعطيك بألوانه تشاكيل وألماح
مثل الخرز ومشاركه دق نيله

ارضٍ عليها مشي الاقدام يرتاح
سجتٍ قدم بالنعل ماتحتري له

ليا ذعذع الغربي وريح النفل فاح
سقوى سقى الله سجت فيه ليله

بأطراف قطعانن تمرجح تمرجاح
ترعى فالارض قفرٍ خلا مولفيله

يقهر له المقهور سرحه ومرواح
وتكسر على صوت الحوار وعويله

وترازمٍ لفواق من ذود مصلاح
ودرهم بمحلابه ونفذ شليله

وقرب لهن ماعون لين الرغو ساح
ما كنه الا بالوقايا يسيله

اثن البطون السداس مجهم ومضياح
ومن لا كسبهن ساعته عزتيله

حتيش لو يكسب ملايين الارباح
تعبان قلب وراس يومه وليله

يتعب وتاكلها قليلين الافلاح
ناسٍ تجي بعده وتنسى جميله

ومرقد العمر الفنا وين ماراح
فراشه الطين وغطاه النثيله

وتطلع ملايكة العمل بيض الالواح
وتخسر بها اعمال اليدين البخيله

ويخسر بها اللي يعمل الجرم منزاح
توه بدا ولا لياله طويله

مثل البهيم ليا شبع فالحيا صاح
لمتلى بطنه تزايد صهيله

وليا غاب بطنه صار للحق نفاح
مايكتب الا الناقصه والفشيله

لاخايفٍ ربه ولا طاع نصاح
يلعبه الشيطان بيا وسيله

نذل يبى بالجرم شهرة ومداح
يرضى شياطينه ويزعل كفيله

وهذاك حظه لو صعد للعلا طاح
جزاه نار ما عمل تحتري له

من طرف **بدرالشمال** الثلاثاء مايو 29, 2018 2:35 am

قصيدة ( : وقالها الشاعر شقير وتحكي عن واقع هذا الزمن العجيب

يالله يا محيي الشجر عقب الامحال
يارافع السبع الشداد بعمدها

يخالق اجيالٍ ويا مفني اجيال
ياعالمٍ بغيب السنين بعددها

تنصر هل الطالات ذربين الافعال
ونبت الردي يامستجيب اتحصدها

وتجعل جهنم منزلة كل الانذال
والطيبين لجنة الخلد قدها

الطيبين اجعلهم صافي الاعمال
والخايبين بحشر الاهوال زدها

قلته وانا ماني للاعراض بكال
ومن خاف من روس الرخوم يعبدها

مسند على الخايب ولشكي له الحال
اصد عنه بخطوتي واعتمدها

لو هو من الادنين يخسون الانذال
در الحماره دون يكفي ولدها

النذل ما يقدر من الطيب مثقال
والخايبه لازم يجي في نصدها

ما اتبع ارضاه ولا انخضعله ليا عال
نذلٍ ليا قال التوايع جحدها

اشكي على الطيب ليا ردني جال
الي يحل القاسية من عقدها

حلاّلها في حزة النقض فتال
لمد حبله للموارد وردها

وانصاه باللازم ليا حدني حال
واقفي عن انذال العرب وابتعدها

ماني بسندها على كل رجال
خطو الوجيه اللي مغيبٍ سعدها

اللي مغار اصوات في صورة ازوال
بومٍ قصر عن صوتها فعل يدها

ناسٍ يحسبون المراجل بالامثال
تزرع سوالف والزمان يحصدها

هرامة المجلس خبيثين الاعمال
كبده تموت بغّـلّها ما بردها

تصنع له افكاره مشاريع وجبال
وليا بغاها في يده ما وجدها

تجار ليل وفي الضحا تشكي الاحوال
تضيع في ساعاته اللي رقدها

اهل القلوب السود هابين الافوال
من حسدها خلاق الاشيا حسدها

مثل العذارا بالطبايع والاشكال
ما تفرق اخته عنه غير بنهدها

لا هوب لاحرمه ولا هوب رجال
ولا زاد قوم ولا نقص من عددها

عسى ادور عشقته فيه الابدال
وعسى تخيب الوالده من ولدها

أمٍ تباه يطول شبره ولا طال
ميت يحسفها وحيٍ لهدها

والنذل يبقى نذل لو يجمع المال
ومن ضرته سود الليال يحمدها

وترى الرجال اصناف وانواع واشكال
والنار تفنى والرمادة بعدها

تخلى الرمادة …………
مهما يكون لهيبها من وقدها

من طرف **بدرالشمال** الثلاثاء مايو 29, 2018 2:40 am

ديوان الشاعر الكبير : شقير بن عقيل الجذع الروقي العتيبي
قصيدة (9) : قصيدة موجهه من شاعرنا الى مطلق بن عبدالهادي الضميان توضح الثلاث الاشياء (لغز) ، لاتنسو الحل

شف قلبي يا بن هادي ثلاثٍ بينات
يتزيد شوقهن يوم يبدي حلهن

هن هوايا والرياجل كلن له صفات
ولو غفل عنهن قصير النظر راح إلهن

دايمٍ في موج فكري يا مطلق حاضرات
ولو حصلي وحّده قلت ابيهن كلهن

اتشرف بأسمهن حاضرات وغايبات
وستعز بعزهن واستظل بظلهن

اسمهن عز الفتى فالحياة والممات
ولا ينال اعجابهن لين يتعب خلهن

ولو عطني يابن هادي وعد ومعاهدات
فيه ناس اصحاب غيري وفيه اعدا إلهن

هينات لينات عّجابٍ قاسيات
ولو صفلي بعض الاوقات مايصفلهن

بينهن وبين الايام سو مفاهمات
الشدايد ريف هن والرخا ضد إلهن

الشدايد تثبت اصحابهن علمن ثبات
والرخى يمكن اصحاب الرخى تاصلهن

يعشقن ارجال ورجال عنهم شايمات
ولا يعيش بجوهن كود من يعملهن

ومن عشقهن بعض الايام يمكن ما يبات
والمتاعب من سلوم الرجال ارضى إِلهن

ولو رضي الرجل بوحده نفن الباقيات
ولو رضي ثنتين وحده بقت ترطنلهن

واصبحن بعشق معشوقهن ناقصات
ومن مشى ممشى زمنهن بقى عمٍ إلهن

خالهن من جدهن بالوصول مرددات
ما نقول فلان ابوهن ولا خال إلهن

وبينهن وبين بعض الرجال مطاوحات
ان سكن مساكنهن وأن بقى جار إلهن

رجل يرضن به ورجال عنه محرمات
ما يودن له رسالة ولا يرسل إلهن

ما يساهم باسمهن لو تصير مساهمات
والردي لو زاد ماله ماهو شف إلهن

شفهن ذربين الايمان حصن الواجبات
مودعين قلوب الاعداء تموت بغلهن

في هواهن يطلبن القلوب الطيبات
وان لفاهن قلب مخلص بقى ملفلهن

فالقلوب وقمة الروس دايم ساكنات
وبهن الله عز روس وروس ذلهن

ومن ملكهن كلهن فاز وهنه فايزات
واصبحن عزٍ لراسه وهو عز إلهن

بس تشروط له الصادره والواردات
ومن رضى بشروطهن لازم يركنلهن

شرط هن سهر الليالي ونطح الموجبات
والفروض الخمس من شرطهن وافطنلهن

اسمهن في جسمهن ثلاث المعجزات
وان عرفت احلولهن يابن هادي حلهن

اسمهن بالداء والشين والكا كاملات
والكمال لمن رفع ذكرهن تاج إلهن

الاسامي تختلف بالحروف المجملات
انتبه والحرف الاول هذا رمزإلهن

من خلقهن ربهن يعشقن وعاشقات
قلب يعشقهن وبعض القلوب اتملهن

ومن حصانة حبهن للرجال محصنات
الله اللي دل عشاقهن ودلهن

وكم عشيرٍ عاشرنه وتال العمر مات
ولو بكن له عوج الايام ما يبكن لهن

الليال بغلبهن يضحكن ومعجبات
مايبن لهن غليبه ولا ياونلهن

الليال بحكم خلاق هنه ماشيات
ان مشن في صفهن وان مشن عكسلهن

ونوب سترٍ للخوامل ونوب مفضحات
الوفا من طبعهن والشرف باب إلهن

اسمهن تحكيبه الناس من سبع اللغات
ولو تتقت روسهن ما تقى صيت إلهن

كل رجمن للشرف في حجاه موايقات
ما يريدن التقا والبيانه اجولهن

مترفاتٍ مطرباتٍ عفافٍ طاهرات
سعد من حظه ملكهن وصار اخولهن

يابن هادي ويش رايك بهذا المترفات
قل يسعن معهن الرِجل ولا خلهن

وان ومرت بدربهن يازبون الموجفات
لا تحط اعلان باسمي قبل تعلنلهن

لا تحملني عناهن دون موافقات
وان عطنك علم قلي خبرك وقلهن

خلها كلمة عداله بدون مجاملات
ولا تصالحهن مع اللي ماهو كفوإلهن

قلتها يومٍ قلبك لبيب للوصات
تفهم المعنى وتسكب طرف عدّ إلهن

ساكنٍ باطراف عدٍ يجنه واردات
ان لفن لك عم ولا تجي لاف إلهن

حط بالك للمجابيل وأنسى الرايحات
وان عصاك الوقت شد الحبال وتلهن

مايجن الا بشد الحبال المحكمات
والليالي كل ماترتخي يرخلهن

وتم معناهن بذكر الرسول مع الصلاة
وباسم خلاقٍ خلقهن وزين دلهن

من طرف **بدرالشمال** الثلاثاء مايو 29, 2018 2:41 am

ديوان الشاعر الكبير : شقير بن عقيل الجذع الروقي العتيبي
قصيدة (10) : وهذه قصيدة من شاعرنا في مدح محمد بن قشعان العتيبي

ترى المال زوده نقص ماغير ابن قشعان
ياكود الرجال اللي تثمن مواجيبه

اقوله وانا مانيب مجامل ولا غلطان
اجيب الدليل لكل من هو يغني به

وانا ما بديت البيت الاول بلا برهان
وانا ممدح اللي جزمته مطلعت طيبه

محمد نزله منزل يتعب الرديان
صعيب على ولد الردى ما يهقوي به

ربط طنب ابن جهجاه في طنب ابو فيحان
وبنى البيت فالقمه وثبت مناسيبه

وترى البيت مايقف اليا اختلت العمدان
وترى مايشده للعمد غير اطانيبه

بنى بيت عزٍ للرجوله على سيسان
طويل الذراع له الفخر لو يماري به

ولبس جوخةٍ للحرب تضفي على الامتان
ورمى الحبل في عزٍ طوالٍ مجاذيبه

اعدودٍ غزيرٍ جمها يبهج العطشان
ليا غثبرت بعض الليالي مشاريبه

ليا صاح صياح الضحى واشتبك دخان
يبا من جحيم النار يقبس مشاهيبه

وترى من قبس من نار طيب شعم نيران
وترى من قبس من نار خايب نقل خيبه

وترى الطيب عزٍ للفتى والضعيف يهان
وترى النعم ما كل يحوشه ويحري به

وترى ما ياقف في ماقف الحصن غير حصان
ولا كل من وده برجم يعدي به

وترى الطيب لاهل الطيب مهما يصير وكان
سوات الذهب معروف من غير تجريبه

مجالٍ كتبه نعم والعلم له نيشان
اقوله وغيري من يقوله ويمشي به

ماسوى سواة فلان وفلان وابن فلان
اضعوف الرجال اللي مراجلهم الغيبه

هل الزوم نمات بومٍ ورث عقبان
لو انه يجر الصوت دقمٍ مخاليبه

يبا الطيبه لكن وانه وطيبه وان
حرامٍ عليه البشت الابيض يصلي به

وترى المال ما يتعزبه فالحياة اهدان
يموت البخيل وكرمة النذل في جيبه

خسارة ولو ان البنك من ثروته مليان
حصيله منه ذنبه وشدة عواقيبه

اقوله واقول النعم يثنى لابن قشعان
عدد مادارجه الهبايب وتجري به

لحيث عن الجزلات ماسكر البيبان
محله سلوم الطيب تصبح وتمسى به

شجيع كريم يكرم الضيف والجيران
كسبه نعم مافيه شكٍ ولا ريبه

من طرف **بدرالشمال** الثلاثاء مايو 29, 2018 2:43 am

ديوان الشاعر الكبير : شقير بن عقيل الجذع الروقي العتيبي
قصيدة (11) : قالها شاعرنا عندما كان في الرياض وتذكر نجد وهواها والابل وهاضت نفسه شعرا جميلا

كتمنا البلد بالقيض والحر والملهاب
ليالٍ تداول تتعب اللي يجربها

ليا بان نجم النجم الاخر بقي ماغاب
تبين النجوم وتتقي من يحسبها

وانا شف بالي صدر عبله وروس هضاب
ذعاذيع نجد اللي تصافق هبايبها

عذي هواها يبري الهايم المنصاب
يداوي الكبود الهايمه عن لواهبها

احبه محبة صدق ماقلتها كذاب
ويا لايمي فيها لو انك تكذبها

جنوبيها الصاقب وشماليها المرقاب
صفوها المضيح غربها حبر واكتبها

ومن شرق ترفعها الثنادي وضلع الداب
لعل الحيا الهمال يسقى جوانبها

عسى كل يومٍ لسحايب عليها ارقاب
تساقيه لين العشب يسقى جذايبها

مرابى العشاير فالشتا شمخ الانياب
سهاف الخدود اللي تلاوح جنايبها

مجاهيم ولا وضح ينصبه النصاب
حداد الوجيه اللي سناد غواربها

ليا قام يدفعها الجمل والشفق ماغاب
يقب الهديل وكل حايل يقالبها

هذي منوتي واللاش لو زاد ماله خاب
ليا زاد ماله خاب وجهه وخيبها

ردي العزوم اغض ضعيف لو يفتل الاشناب
قليل المعرفه والشكاله مجنبها

ماغير يتصكك عندها صكه المشعاب
على الغمه اللي دلك الاشناب واجبها

يدير الحليله داره الاسود الجذاب
معاليق قلبه باصفر السم يجذبها

لحيثه ماهمه شوفة النوق فالاعشاب
ولاهي معجبته ولاهو معجبها

ربيعه ليا شاف الدجاجه على المنساب
على صيخ شوايه تلف وتدور ابها

من طرف **بدرالشمال** الثلاثاء مايو 29, 2018 2:45 am

ديوان الشاعر الكبير : شقير بن عقيل الجذع الروقي العتيبي
قصيدة (12) : في الابل والحرص على اقتناها

ابنصح صديقي يشترى وضح قبل الموت
يشوف الربيع ليا نبت ويتمتع به

يشوف الربيع وللمغاتير يرمي صوت
ليا هايف المرقاب فالعصر يطلع به

عن القصر اباه يداوي المروت
لعله ليا شم النسيم يتولع به

ليا شاف له وضح تلامع كما الياقوت
من الجال الاقصى مايلاتن على دعبه

تكسر على الحيران مثل الفهود سكوت
ليا جر صوته جرة الصوت تقرع به

على الصوت ممشاهن مثل لابسين البوت
مثل مشيت الطابور لمعلق الجعبه

على قعدة ملحه تشوت المضامي شوت
تبى مشرعٍ قدم الادباش تشرع به

جذبهن شريك اعقولهن بالغنا والصوت
تداحم على ورك الرحول وتسمع به

ليا صاح لو ان الحوار الصغير يموت
تخليه يقعد فالخلا ما تشوع به

ليا صكهن ريعٍ وباين وراه خبوت
معشى القفر راعيهن العصر يطمع به

مراجل هل الطالات ماجابها سربوت
ابا انصحك بالصعبات ياراعي الصعبه

ترى العمر سجه والليالي سوات الحوت
وترى الوقت يقضي يا العقيلي كما اللعبه

تغانم وسج اقدام رجليك قبل يفوت
شباب تدنيه الليالي وتراجع به

وانا مانصحتك خايفٍ ماتحصل قوت
لكن الشجيع ليا شراها تشجع به

ابا فالربيع يوصلنك ديار بخّوت
وقت المصيف يسندٍ بك ليا الشعبه

وانا احبها حب العواجي عقاب النوت
وعسى مبغض البل يبغضه منزل الكعبه

من طرف **بدرالشمال** الثلاثاء مايو 29, 2018 2:46 am

ديوان الشاعر الكبير : شقير بن عقيل الجذع الروقي العتيبي
قصيدة (13) : وهذه اكيد مشهورة لان الكل يطلبها من شاعرنا الكبير

صاحبي مع نجع عتبان شدو به جنوب
مطلع النجم اليماني تنصاه ضعنه

جرهم عساس بدو يسولف بالعشوب
قال من جاب الخبر قال انا جايك منه

عان خشم مذقان الادنى يكفك كف ثوب
لا ورا نجران ما فيه فتق ولا سنه

جرهم جروه للسجن في تهمة حبوب
جره اللي متهمه بالجريمة ومهنه

المباني طويت والدبش ذب الدروب
والدريول كل تاير على الجيك اوزنه

انتحوا به يافهد والهوى سم القلوب
ان كناه المبتلى بالهوى وانا اعلنه

ابتعد عني وانا صرت بالبعد مغصوب
ما جداي الا ابدع القاف واجر ألحنه

رحت انا في صوب ودقيق المثاناه في صوب
لعنبو يوم المفارق عليه ملعنه

لعنبو يومٍ يفرق مواليف القلوب
يجرح العشاق ويحط فالقلب طعنه

ساعةٍ قلب الموله خطير إبها يذوب
والدقايق من زمنها تقدر عن سنه

ساعة الفرقى عقايب وذنب من الذنوب
يوم مالي حيله الا انشد الطرقي عنه

انشد الطراش واقول هبي ياهبوب
وعلميني وان دارٍ هوى البال سكنه

هو رجع للمدن ولا مع البدو العزوب
يتبع الشول العفر ويتغذى بلبنه

في هوى سحج العشاير عريضات الجنوب
امتحنهم شايبٍ جعل ربي يمحنه

مرةٍ بأطراف عدفا ومرةٍ بالهضوب
وكل يومٍ شدته بالميات مقننه

كل مصبح شب ناره وزودها شبوب
وان خلص من دلته قال طوي ياهنه

عجلي قدام يحتر بالشمس اللهوب
المعشى نبت برقه ومن دونه سنه

كل بيرٍ شاربٍ مرة منها شروب
ماسكن في دار واحد ولا عدّ قطنه

عذب المجمول واذهب مداويره ذهوب
اذهب الله عرق ابو جده اللي هو منه

من طرف **بدرالشمال** الثلاثاء مايو 29, 2018 2:48 am

ديوان الشاعر الكبير : شقير بن عقيل الجذع الروقي العتيبي

قصيدة (14) : قصيدة اخرى لشاعرنا وعشقه للبر والبادية

قال غن قلت انا وشلون اغني
ضايقن صدري وخربانٍ مزاجي

والله إني والله إني والله إني
ريح ذعذاع الهوى فلة حجاجي

كان ماشفت النجوم ليا اتهبني
لو تعالج هاجسي ماله علاجي

مايداويني ويبري الهم عني
غير صوت الجيب مع خطو الزراجي

ليا سمع سمعي كفاراته تحني
فالذوار اللي مليمها العجاجي

ليا انثنى والعج فالخط متثني
والحصا صقعه مثل قدح البواجي

ويش كن الوقت وانا ويش كني
كني اللي له على العربان باجي

من طرف **بدرالشمال** الثلاثاء مايو 29, 2018 2:49 am

ديوان الشاعر الكبير : شقير بن عقيل الجذع الروقي العتيبي
قصيدة (15) : غزلية ويخلط ذلك بوصف عجيب لايقدر عليه الا هو

وصاحبي هذا محله ومبناه
قبل اسبوعٍ جيت فيه ولقيته

واليوم جيت لمنزله ما لقيناه
واللي لقينا عقبهم ما بغيته

شفت الرسوم وجدد الشوق ذكراه
وناديت باسمه مرتين وبكيته

قالوا علامك قل جفنٍ كفى ماه
لا رد لي رايه وانا ماعصيته

خلوه لين الدمع يظهر خفاياه
اما ومرته زود ولا نهيته

يمكن غزير الدمع تبري سواياه
قلبٍ كواه الحب انا ما كويته

سبت خليلٍ خلّ قلبي وخلاه
ماطور مطرودٍ خلط ماه زيته

جمسٍ مخيف وضايمه طول مسراه
وتكانفه جيب الخفر مع ونيته

لازام قدمه والابيتر تعداه
والله رماه بفرقةٍ مستبيته

جاين عنه تبليغ وهيه تحراه
وراحو معه فالعرق الاول عميته

وعقب احرجوه الجيب دقر له ارطاه
وسايق ونيت الخفر غرز ونيته

وهو سرى صفق الهوا مع زواياه
اعصار عاصوفٍ تسوقه سحيته

وعقب اظهروهن فاختٍ درب ممشاه
وشافولهم ليتٍ يحالي ليته

جمس ابدوٍ ضايع له ولد شاه
طفله غدى ويدوره حول بيته

اننعطب مجاهاه وهو بمجاهاه
وراحت سوالفهم اطلاب وشميته

وكلٍ بقى يشمت خويه ويشناه
ويقول للرامي ورا مارميته

قال البلا السواق غرز وخلاه
وانا من الربشه سلاحي نسيته

وهفو مهف امقيط فالضلع ورشاه
وضاعوا وراحوا فالخلا عن فتيته

والجمس سواقه بليله تسراه
الحمل جاير والهوا مجتفيته

وقعد خوي دريول الجمس ينهاه
ويقول ضاعوا قال ياليت ليته

ولا المدارا اليوم ما به مداراه
والله لنزل حملته ما دريته

وليا انكسر من تانكيه حرقناه
اما فقر ولا حياةٍ بخيته

وسروا وحمله تالي الليل وطاه
فالموقع اللي نيته منتويته

وعقب أمنه وقف وحول وطفاه
واصبح ليا نصى شنابر حتيته

الوجه رايح والاديتر كفى ماه
وعيار زيته ناقصن عنه زيته

قالوا علامه قال من كثر ماجاه
ليا حداه العرق يمه حديته

ليا انثنى العرق الموالي قطعناه
وليا زما العرق المناحر نصيته

بثنين احده ونهمه وتحداه
وليا عصاني عن طلوعه عصيته

انحره عرق طويلٍ معداه
ولا عذاعذ خلتٍ مستميته

خايف وحاديني مقاطع ومضماه
ولو لا كذا عن ماجرى له رفيته

قيره وبنصه والدركسون يجداه
وان ضيع الدرب الدليله قديته

وهذا ودرب الجمس كملت معناه
بقافٍ لعشاق المثايل بنيته

تعبير من عينه بخله مشقاه
الصاحب اللي لو نسي مانسيته

احب اجامل خاطره وترضاه
وليا قطع وصلي على الله شكيته

لو هو جفاني بالهوى مقدر اجفاه
وان باعني برخيص غالي شريته

لوني لو قلت احلي حلاياه
اتعب وبعض اوصافهم ما لقيته

الضبي فيها جملة من حلاياه
والخيل فيه اصوف منه ان هقيته

زينٍ طبيعي بس كحله وحناه
ما خالطه شي معه مشتريته

وجدي عليهم ياهل العرف وجداه
وجد اليتيم اللي تقول وتليته

عوباٌ توريه العزاير وتقفاه
وثقبها اللي جعلها ينهد بيته

ليا بكي قالت هذا الورع شرواه
يبكي لو اني كل شي عطيته

عقب امه اللي تاخذه بالمداراه
اونس من العمه حياة الشميته

من طرف **بدرالشمال** الثلاثاء مايو 29, 2018 2:51 am

ديوان الشاعر الكبير : شقير بن عقيل الجذع الروقي العتيبي
قصيدة (16) : وهذه غزلية جميلة من شاعر كبير

وقلبي اللي صايرٍ به خوايا
يحتاج عن حب العماهيج منظار

سبة ثلاثٍ جدد(ن) به سوايا
العصر يوم الله قسم لي بمسيار

جني وأثر هن ناوياتٍ نوايا
يبن قتلي عمد واللي نوّن صار

المخ اخلن فيه بعض الخلايا
والقلب خلنه يفكر ويحتار

بزين الوصوف وفارقات التهايا
وسود العيون وزين شكبات الاعمار

الضبي منهن فيه وصف وحلايا
وازريت لافرق بينهم والقدم حار

جني بلبس وكن هنه عرايا
لبس الدلع وانا يشوقن الانظار

خشوف اللي من ذيرتها الرعايا
ما يرتعن الا جديدات الاقفار

هيم البطون دقيقات الشفايا
نجل العيون نحورهن مثل الانوار

منزيات كن ابطونهن قوايا
مغار صدر وردف ووسوط ضمار

وشقرٍ على الارداف مثل العوايا
اشقر تقول بمقدمه يشتعل نار

سودٍ لطراد المحبه منايا
ليا شافهن صاحي الفكر ينهار

عين اشقرٍ وايق بعين الحجايا
يشوف له جولٍ تدارج ولا طار

واللول كنه بين هاك الثنايا
او قحويانٍ نابتٍ فيه نوار

بعد ثلاث وسبع واربع عشايا
في ماقعٍ خالد ساقيه الامطار

ولو قلت ادورهن بسبع النحايا
ياضنتي عن وصفهن ملقى الاذكار

لا هن متان ولا نحاف هرايا
سبحان خلاق البشر محيي الاشجار

غصون موز فوق حوض روايا
في فيّ وناش تساقيه الانهار

او عود ريحانٍ يوزع هدايا
تشريه تجارٍ وتجلب لتجار

ماشفت انا لوصافهن تهايا
لا والذي لمكسر العظم جبار

الا من الغزلان فيهن حلايا
طول الرقاب وصدة الضبي لانذار

وفيهن عن الغزلان فرق ومزايا
بعدّ التواصيف تقول عِيِّب الابكار

اجسام بالطول المعدل رهايا
لا هن نعانيعٍ ولاهن بقصار

مثل الذهب يفرق بوزن الوقايا
يزيد سعره لو يطيحن الاسعار

الا حلاهن بزينة سجايا
وانا بليت بحبهم سر وجهار

وجدي على ما مز هاك الشفايا
قدام يلقى العمر قصاف الاعمار

وجدي عليهم وجد راعي ودايا
يبست سواقيهن وماء عدهن غار

من عقب ما كانن جمامٍ سرايا
نشفت مجاري ماه مافيه قطار

الجبو مقطع وقطعن الركايا
وحتى الحمام اللي على جوهن طار

وراحت جرايدهن سوات الحنايا
يبس الجريد وحت عرجون الاثمار

او وجد من ماله بنا به بنايا
حول به الزلازل من عشرة ادوار

ويا لجتي لجتة ذهيبٍ ضمايا
وردن وردوهن رديين الاشوار

في لاهب المرزم ضماين حفايا
وعلى المراكيب برّكن فوق الازوار

ودكن وقامن يسبرن الهبايا
بجوٍ خلا ما به من النزل ديّار

على الذي منهم جروحي خفايا
كن الحشا من عقبهم يلهبه نار

حطن عليه مثلثات الكوايا
وراع الهوى دايم على الجرح صبار

منهم عنا قلبي منهم دوايا
ومنهم شربة من الهوى كاس الامرار

هوى النفوس انواع وهما هوايا
لو خيروني غيرهم ما نبا اختار

ولو قلت اوصي ماتفيد الوصايا
اخاف انا من هرج حاسد ومغتار

اخاف ياخذها بعين الخطايا
ولا يوصلها ليا كشف الاسرار

يفرح عليه بكلمةٍ من عدايا
الوقت باير واكثر الوقت بوار

ماغار افكر من خلاي بخلايا
واعوي عوا ذيب سبرله بمسبار

قنيب سرحيٍ حدته الضرايا
يحوفله فرقٍ ورا شبك وحضار

يا من سمّيه بين هايا وهايا
ويا من سمّيه بين غايب وحضار

هدمت قلبي هدم خطو الهبايا
لجرها وادٍ من الوسم معتار

بخدٍ عليه رموش عينك ضفايا
كنك تدق ابها على قلبي اوتار

وردتني بالحب حوض المنايا
ترقد وانا نومي هواجيس وافكار

والعفو يا معطي جزيل العطايا
اطلبك غفرانك وعتقك من النار

من طرف **بدرالشمال** الثلاثاء مايو 29, 2018 2:52 am

ديوان الشاعر الكبير : شقير بن عقيل الجذع الروقي العتيبي

قصيدة (17) : مساجلة بينه وبين غازي بن جري العقيلي المطيري ، والبداية مع قصيدة غازي ثم رد شقير عليه

هيونا جمسٍ جديدٍ مديله
مصنوع حسب مواصفاتٍ وتفصيل

ما فوقه الا سايقه والدليله
وازروف فيها بين الاحباب تسجيل

لكن حذف المرو من خلف ويله
حذف البرد من مستهل الهماليل

المهد مسراحه عفيفٍ مقيله
تلفي على اللي فالقسا يذبح الحيل

شقير شيال الحمول الثقيله
شيال حملٍ للهوى ما بعد شيل

ثم اخذوا جلستٍ وتعليله
والزعفران يدور بين الفناجيل

في مجلسٍ يستانس اللي يجيله
بيبان بيته مدهلٍ للرياجيل

واعطو له المكتوب والله وكيله
ولاهو محتاجٍ مترجم وتحليل

يا شقير انا قصة غرامي طويله
قريبةٍ وابعد من الجدي وسهيل

ما ينعذل سيل النحا عن مسيله
دايم على مجرى النحا يمشي السيل

هذا بعد حاولت من كل حيله
وفشلت مساع الواسطة والمراسيل

ولولا على الاجوا مزونٍ ضليله
لصبح صباحن بتهليل

صباح يشفي به قلوبٍ عليله
بفريس مشتركين جذعان وعقيل

ثم رد الشاعر الكبير شقير بن عقيل الجذع عليه بعد ان عرف مطلبه بهذه الابيات:

حي الكتاب وحي من جاء يشيله
وحي الونيت اللي لافاني بتكميل

جمسٍ عليه من المطيري رسيله
بأبيات شعرٍ لنشاما تعاليل

غازي عليه ارسل حروفٍ جميله
فيها لعرّيف النشاما دواليل

يقول بالمظروف جهز رسيله
واللي لفتني صورةٍ مالها صيل

ارسلي الصورة ورد الاصيله
مدري وراه يبدل الاصل تبديل

مدري الورق عنده فروخه قليله
ولا شحيح لمدت الاصل وبخيل

حنا عتيبه ما نمد الهزيله
ولا نقتنع بالهزل ولو هو من القيل

نأخذ من الجزله ونعطي الجزيله
ونحلل الكلمه ثمانين تحليل

نأخذ ونعطي كل بيضاً جليله
بالمد ولا بالعلوم المقابيل

ننطح نحورالهرج ما نستخيله
وكلٍ على كيله نزود له الكيل

نكيل له من صاعه اللي يكيله
وحنا لصعبات المواقف مناهيل

وجنابنا ريف من يلتجي له
لجا نهارٍ فيه منع ومداخيل

يومٍ ولد اللاش يلطم دخيله
دخيلنا في راس عيطاً عن الميل

وليا نخانا اللي سواتك نجيله
ونمد له حبل طويل المواصيل

حبلٍ ليا من تحقق حصيله
يشفى ضمى بعض القلوب المعاليل

يشفى القلوب الهايمات العليله
وقلوب يوريها حياة البهاذيل

صديقنا نشفي ضماه وغليله
وحريبنا نسقيه زاد المفاتيل

نسقيه فأثنى المعركة حنظليله
بمسلبات زادهن فالمناقيل

حريبنا عند الوعيد نعني له
بالفور ما نأخذ للاوعاد تأجيل

حنا عتيبه كم فن وقبيله
لطامة العايل على مثل ماقيل

دقلاتنا مثل المزون الثقيله
ينزل بردها فوق روس الاقاذيل

وليا قدح فالنار زند الفتيله
تنذر بنا الاتراك شعب البرازيل

يا بن جري عقب النخا ويش هيله
ابشر بمطلوبك على كل تسهيل

بأسم الله الخلاق منشي المخيله
محيي هشيم القاع بأمره مكاييل

وجمسك وصل بعد الدروب المهيله
ولاهله قدمت اشقر البن والهيل

وحيلٍ من اتجار الغنم نشتريله
مع كلمةٍ تقري بليا مواكيل

وجهزت لي معه اربعه من مديله
ما ناش بويتهن يا كود المناديل

دلايلٍ له لو يتيه الدليله
ولا يجي بالدرب ريبه وتزويل

واللي جرح غازي وبيح حفيله
لازم تجيبونه لو انه ورا النيل

اخذ النعت من خوف تيه وعيله
ترا لهم بأطراف حاذه مداهيل

والهضبه اللي فالحفيظ البتيله
من راسها مدوا جداد الدرابيل

اما على الضيحه تشيفون زيله
ولا يجيكم من عربهم دواليل

يجيك بالاخبار مومي شليله
اهل الذهيب مدورين المقاييل

وما كف ذخر اللي مفايض نجيله
وما ردت الحرة ليا شّعرّ وكحيل

اما يوصف نايفٍ تقتدي له
ولا تشوفون العرب والمنازيل

وليا لقيت النزل لا تستسي له
اما رضي بالعلم شيلو إله شيل

ثم سلموا غازي ولاية خليله
وخل العقيلي بالفرح يطرد الويل

الجم مايغطى مجمه نثيله
ولايقطع امواج البحر بارد الحيل

جذعان ون نجنج على نجد كنه

جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

ديوان الشاعر الكبير : شقير بن عقيل الجذع الروقي العتيبي

رد: جذعان ون نجنج على نجد كنه

رد: جذعان ون نجنج على نجد كنه